ज्येष्ठ बँकिंग व गुंतवणूक तज्ज्ञ अरविंद खळदकर यांचे निधन

जनता सहकारी बँकेचे माजी अध्यक्ष, डेक्कन एज्येकशन सोसायटीचे माजी अध्यक्ष, भांडारकर प्राच्यविद्या संशोधन संस्थेचे माजी विश्वस्त, महाराजा शिवछत्रपती प्रतिष्ठानचे माजी विश्वस्त, सहकार भारती नागरी बँक विभागाचे मार्गदर्शक आणि राष्ट्रीय स्वयंसेवक संघाचे ज्येष्ठ स्वयंसेवक अरविंद केशव खळदकर (वय ८४) यांचे शुक्रवारी (२८ ऑगस्ट) रात्री १० च्या सुमारास अल्पशा आजाराने दु:खद निधन झाले. त्यांच्यामागे दोन मुले, दोन मुली, सूना, जावई, नातवंडे असा परिवार आहे. आज दुपारी त्यांच्या पार्थिवावर वैकुंठ स्मशानभूमीत अंत्यसंस्कार करण्यात आले. यावेळी बँकिंग, सहकार, सामाजिक, राजकीय, सांस्कृतिक अशा विविध क्षेत्रातील मान्यवर उपस्थित होते.

विविध विषयांचा व्यासंग असलेले खळदकर तल्लख बुध्दीमत्तेचे कुशल प्रशासक होते. आयकर खात्यातून उपायुक्त पदावरुन त्यांनी १९९४ मध्ये स्वेच्छानिवृत्ती घेतली आणि त्यांनंतर ते अखेरपर्यंत कर सल्लागार म्हणून काम करत होते. जनता सहकारी बँक लि., पुणेचे ते १९९७ पासून संचालक व २००१ पासून अध्यक्ष होते. त्यांच्याच कार्यकाळात जनता सहकारी बँक आर्थिक अडचणीतून बाहेर आली, ज्याचे रिझर्व्ह बँकेने देखील विशेष कौतुक केले होते. याबाबतचे त्यांचे ‘नवल वर्तले’ हे पुस्तक विशेष गाजले. मराठी आणि इंग्रजीतून प्रकाशित झालेले हे पुस्तक बँकिंग क्षेत्रात अभ्यासासाठी घेतले जाते. त्यांच्याच कार्यकाळात जनता बँकेला बहुराज्यीय बँकेचा दर्जा मिळाला. याशिवाय शेअर बाजाराशी मैत्री, जोडोनिया धन शेअर्स व्यवहारे, गुंतवणूकीचे शास्त्र ही त्यांची पुस्तके वाचकप्रिय झाली. शेअर मार्केट, गुंतवणूक, बँकिंग आणि सहकार या विषयावर अनेकदा व्याख्याने दिली आणि विविध नियतकालिकांमधून विपुल लेखनही केले होते. संतसाहित्याचा त्यांचा विशेष अभ्यास होता. मराठी, इंग्रजी आणि संस्कृत भाषांवर त्यांचे विशेष प्रभुत्व होते.