पतसंस्थेमधील गुंतवणुकीवरील परतावा आयकर मुक्त -सहकार आयुक्त तावरे

मुंबई – रिझर्व्ह बँकेच्या परवानगीने काढलेल्या कर्ज रोख्यांमध्ये सहकारी पतसंस्थांसाठी गुंतवणुकीची सुवर्णसंधी उपलब्ध आहे. ही गुंतवणूक वैधानिक तरलतेच्या निकषांत बसणारी असून त्यावर मिळणारा परतावा आयकर मुक्त असल्याचे सहकार आयुक्त दीपक तावरे यांनी सांगितले.

महाराष्ट्र राज्य सहकारी बँकेच्या वतीने येथील वाय. बी. चव्हाण सभागृहात सहकारी पतसंस्थांच्या विविध अडचणी आणि राज्य बँकेच्या रोख्यांमधील गुंतवणूक या विषयावर एकदिवसीय परिसंवाद आयोजित करण्यात आला होता. परिसंवादाला राज्य सहकारी पतसंस्था फेडरेशनचे अध्यक्ष ओमप्रकाश दादाप्पा तथा काका कोयटे आणि  सहकार आयुक्त दीपक तावरे अध्यक्षस्थानी होते. परिसंवादात राज्यातील सहकारी पतसंस्थांना भेडसावणार्‍या विविध अडचणींबाबत सविस्तर चर्चा झाली. व्यासपीठावर सहकार खात्याच्या बँकिंग विभागाचे अधिकारी अनंत कटके आणि सहनिबंधक नितीन काळे होते.

मलकापूर अर्बन को-ऑप. सहकारी बँक व नाशिक जिल्हा मध्यवर्ती बँकेत अडकलेल्या ठेवी तातडीने परत मिळविण्याची मागणी फेडरेशनचे अध्यक्ष काका कोयटे यांनी केली. तसेच सहकार खात्याचे कामकाज ऑनलाईन करण्याची गरज सांगितली. थकबाकीविषयक प्रकरणांचा निकाल कलम 101 अंतर्गत त्वरित लावावा, असेही नमूद केले. अपसेट प्राईस वेळेत निश्‍चित करण्याची आवश्यकता त्यांनी अधोरेखित केली. राज्य सहकारी बँकेचे प्रशासक विद्याधर अनास्कर यांची नुकतीच नाशिक जिल्हा मध्यवर्ती सहकारी बँकेच्या सल्लागार मंडळाच्या अध्यक्षपदी निवड झाली आहे. त्यांनी शेतकर्‍यांसाठी एक रकमेच्या परतव्याची चांगली योजना सुरू केल्याने आगामी सहा महिन्यांत ही बँक आर्थिक अडचणीतून बाहेर येण्याची शक्यता आहे, असे ते म्हणाले.

अनास्कर म्हणाले की, राज्य सहकारी बँकेने त्यांच्या कर्ज रोख्यांवर साडे आठ टक्के व्याजदराने कर्ज सुविधा देण्याचा निर्णय घेतला आहे. या परिसंवादात राज्यातील विविध सहकारी पतसंस्थांनी एकूण 50 कोटी रुपयांची गुंतवणूक करण्याची घोषणा केली. मलकापूर अर्बन बँकेतील ठेवीदारांचे प्रश्‍न मांडण्यासाठी फेडरेशनचे उपाध्यक्ष शांतीलाल शिंगी, संचालक राजाभाऊ देशमुख, आबासाहेब देशमुख यांनी तर अ‍ॅड. अंजली पाटील यांनी नाशिक जिल्हा मध्यवर्ती सहकारी बँकेत सहकारी पतसंस्थांच्या अडकलेल्या ठेवींबाबत भूमिका बजावली.

कार्यक्रमाला फेडरेशनचे संस्थापक वसंतराव शिंदे, उपाध्यक्ष शांतीलाल शिंगी, संचालक डॉ. अंजली पाटील, राजाभाऊ देशमुख, चंद्रकांत वंजारी, भास्कर बांगर, सुरेश पाटील, शरद जाधव आदींसह राज्यभरातील अनेक सहकारी पतसंस्थांचे प्रतिनिधी उपस्थित होते.